4 Nentor 2023

Fjalimi i tij ishte pritur me ankth thuajse në gjithë botën, që nga sulmet e ashpra të 7 tetorit në Gaza, që rikthyen frikën e një Lufte të re Botërore. Bëhet fjalë për Hassan Nasrallah, liderin e Hezbollahut, një organizate, që ndoshta në heshtje, duket se ka “luajtur fijet” në prapaskenë gjithë kohën. Dhe ashtu rezultoi. Hassan Nasrallah, lideri i grupit islamik shiit libanez Hezbollah, iu drejtua ndjekësve të tij në komentet e tij të para publike që nga shpërthimi i luftës Izrael-Hamas. Fjalimi pritej të tregonte lëvizjet e ardhshme të grupit, pasi luftëtarët e tij dhe ushtria izraelite ishin të angazhuar në sulme intensive në kufirin Liban-Izrael. Megjithatë, iu dha përgjigje shumë pikëpyetjeve, e në të njëjtën kohë ngriti qindra të tjera.

Fjalimi iHassan Nasrallah

Hezbollahu hyri në betejë më 8 tetor, një ditë pasi Hamasi filloi sulmin e tij të befasishëm në Izraelin jugor. Kështu u shpreh në fjalimin e shumëpritur Hassan Nasrallah, sekretari i përgjithshëm i organizatës paraushtarake islamike me bazë në Liban. Sipas Nasrallah, shkëmbimi i përditshëm i zjarrit me forcat izraelite përgjatë kufirit libanez mund të duket “modest”, por është shumë i rëndësishëm, duke e quajtur të paprecedentë që nga viti 1948. “Nëse shikojmë se çfarë po ndodh në kufijtë tanë, presioni izraelit është i paprecedentë.

Është një betejë e vërtetë, e ndryshme nga të gjitha ato në të kaluarën, për sa i përket mjeteve, taktikave, strategjisë dhe madje edhe objektivave: operacionet tona janë shkaktuar nga grumbullimi i armëve i Izraelit në kufi për të goditur Gazën. Ne jemi në betejë që nga 8 tetori dhe mund t’ju siguroj se nuk ka mbaruar”, tha kreu i Hezbollahut i cili prej javësh është përfshirë në sulmet në kufirin me Izraelin.  Beteja e “përmbytjes së Gazës” e nisur nga Hamasi kundër Izraelit “është përhapur në shumë fronte”, tha Nasrallah. Udhëheqësi shiit mirëpriti “armët irakiane dhe jemenase që morën pjesë në këtë betejë”. Ai ia atribuoi Hamasit përgjegjësinë e plotë për sulmin ndaj Izraelit, duke thënë se “Irani nuk ushtron asnjë kontroll mbi fraksionet e rezistencës dhe se vendimmarrësit e vërtetë janë udhëheqësit dhe luftëtarët e tyre të përkushtuar”. Me pak fjalë, ai nga njëra anë kërkon betejë dhe nga ana tjetër minimizon përgjegjësitë. “Ne jemi gati të sakrifikojmë, të japim gjithçka”, tha ai.

Forca e Hezbollahut

Partia shiite libaneze e udhëhequr nga Nasrallah duket dukshëm më e fuqishme se Hamasi për sa i përket luftëtarëve dhe pajisjeve. Luftëtarëve libanezë sigurisht nuk u mungon përvoja. Operacionet ushtarake të viteve 1996 dhe 2006, të kryera nga Izraeli për të gjurmuar dhe shkatërruar bazat e grupit shiit, kanë formësuar në mënyrë të konsiderueshme njerëzit e Hezbollahut. Jo vetëm kaq, por partia e Nasrallah mori pjesë dhe vazhdon të marrë pjesë në mënyrë aktive në luftën në Siri. Në veçanti, Hezbollahu mund të llogarisë në të paktën 100 mijë luftëtarë, shumë prej të cilëve janë veteranë dhe veteranë të konfliktit të 17 viteve më parë dhe të luftës në Siri. Një ushtri e vërtetë, e mësuar për të luftuar dhe e përgatitur për një përballje të mundshme në kodrat e Libanit jugor, këtu ku qëndrojnë edhe sot bastionet e saj kryesore.

Arsenali i frikshëm

Kjo është arsyeja pse Izraeli monitoron nga afër Hezbollahun. Suksesi apo jo i operacioneve në Gaza varet gjithashtu nga frenimi i provokimeve të Hezbollahut dhe ambiciet e shiitëve libanezë. Frika e vërtetë ka të bëjë me arsenalin në duart e Hezbollahut, i konsideruar nga shumë analistë si shumë më i lartë se ai i Hamasit. Thuhet se i gjithë territori i shtetit hebre është potencialisht në pikën kryesore të raketave libaneze.

Luftëtarët shiitë në fakt kanë 150 mijë predha artilerie dhe 65,000 raketa me rreze të mesme Fajr 5, Khaibar 1, M303 dhe Zilzal 1. Më të rrezikshmet, pasi mund të arrijnë potencialisht në kufirin me Sinain, janë rreth 5 mijë raketat me rreze të gjatë veprimi Fateh 110 dhe Scud, të afta për një rreze veprimi nga 260 deri në 500 km. Pastaj janë mini nëndetëset, raketat tokë-ajër Sam dhe mijëra raketa antitank me telekomandë.

Gazeta Sot